جاستار جىلىنا وراي جامبىل وبلىسى اكىمدىگى ءبىلىم باسقارماسىنىڭ «عىلىمي-تاجىريبەلىك دەنە شىنىقتىرۋ ورتالىعىنىڭ» ۇيىمداستىرۋىمەن «وقۋشى ارلانى» ءتۋرنيرى ءوتىپ، وعان تاراز قالاسى مەن اۋدانداردان بارلىعى 87 بالۋان  قاتىستى.

جالپى، مەكتەپ وقۋشىلارى اراسىندا ۇيىمداستىرىلىپ وتىرعان تۇڭعىش تۋرنير 60 كەلىدەن جوعارى ابسوليۋتتىك سالماق دارەجەسىندە جانە وليمپيادالىق جۇيە بويىنشا ءوتتى.  بۇل كۇنى بالعىن بالۋانداردىڭ ونەرىن تاماشالاۋعا «تورتكۇل» كەرۋەن سارايىنا جيىلعانداردىڭ  قاراسى قالىڭ بولدى.  جانكۇيەرلەردىڭ قولداۋىن ايقىن سەزىنگەندىكتەن دە بولار، جەتكىنشەكتەر ايانىپ قالعان جوق. باپكەرلەرىنىڭ ارتقان سەنىمىن اقتاۋ ءۇشىن، بار ونەرلەرىن سالىپ باقتى. وسى ورايدا جاس تولقىننىڭ  قازاق كۇرەسىنە شىنداپ دەن قويىپ، ءارتۇرلى ايلا-تاسىلدەردى جەتىك مەڭگەرگەندىگى كوپشىلىكتى ءسۇيسىنتتى.

ارينە، سپورتتىڭ اتى-سپورت. مۇندا باعى مەن بابى كەلىسكەندەر توپ جارادى. دەگەنمەن، جۇلدەنى وڭايشىلىقپەن بەرە سالۋ تاعى بولمايدى. سوندىقتان دا سالاماتتى ءومىر سالتىن سەرىك ەتىپ، سپورتقا شىنداپ دەن قويعان جاستار قارسىلاستارىن قاپى قالدىرۋعا تىرىستى. بۇل جولعى باسەكەدە جامبىل اۋدانى، بەساعاش اۋىلى، اباي اتىنداعى ورتا مەكتەپتىڭ 11-سىنىپ وقۋشىسى نۇرلان قىرعىزبەك ەشكىمگە دەس بەرمەي،  «وقۋشى ارلانى» اتاندى. ال اقتىق اينالىمدا ءسال ساتتىلىك جەتىسپەگەن وبلىستىق سپورتتاعى دارىندى بالالارعا ارنالعان مەكتەپ-ينتەرناتىنىڭ 11-سىنىپ وقۋشىسى باقداۋلەت ەركىنبەك ۇلى  ەكىنشى ورىننان كورىندى.  ۇزدىك ۇشتىكتى جامبىل اۋدانى، اسا اۋىلى، يۋ.گاگارين اتىنداعى ورتا مەكتەپتىڭ 11-سىنىپ وقۋشىسى جانتورە جۇماباي تۇيىندەدى.

جارىس جەڭىمپازدارى مەن جۇلدەگەرلەرىنە م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ رەكتورى ماحمەتعالي سارىبەكوۆ ءبىر جىلدىق وقۋ اقىسىنا 50 مەن 100 پايىز ارالىعىندا  جەڭىلدىك  تاعايىنداسا، تاراز يننوۆاسيالىق-گۋمانيتارلىق ۋنيۆەرسيتەتىنىڭ رەكتورى ەربولات ساۋرىقوۆ  ءبىرىنشى  ورىنعا – 150 مىڭ، ەكىنشى ورىنعا – 100 مىڭ جانە ءۇشىنشى ورىنعا – 50 مىڭ تەڭگە كولەمىندە سىياقى بەردى. بۇدان بولەك، تۋنير جەڭىمپازىنا قاس شەبەرلەر  قولىنان شىققان «وقۋشى ارلانى» ءتۋرنيرىنىڭ لوگوتيپى بەينەلەنگەن بەلبەۋ تابىس ەتىلدى. 

ەندى جەڭىمپازدار مەن جۇلدەگەرلەر اعىمداعى جىلدىڭ 25-26 مامىر كۇندەرى الماتى قالاسىندا وتەتىن «حالىق بارىسى» رەسپۋبليكالىق الامانىندا ءوڭىر نامىسىن قورعايتىن بولادى.    

بۇل، ارينە، سپورتشى جاستارعا جاسالعان ۇلكەن قامقورلىق. وسىلاي قاناتتانعان ورەندەر بولاشاقتا الەمدىك دودالاردا اتوي سالىپ، ەلىمىزدىڭ كوكبايراعىن بيىكتە جەلبىرەتەتىندىگىنە سەنىم مول.

باقىت جالعاس